ก่อยโลมก่อยเป๊า สั่งลูกสอนหลาน
ฮู้อ่อนผ่อนยาน คำหวานเป่งป้อย
มดดำมดแดง ต๋ายเพื่อน้ำอ้อย
หวานหลงตวยรอย หวานลิ้น
ขบเจ็บแมงมัน ขบคันแมงฮิ้น
ขบแล้วปลอกปลิ้น คนพาล
ควายหนุ่มตั๊วปู๊ ย่อมฮู้ตี้หงาน
จิตใจ๋คนงาม ฮู้กั๋นวงเหล้า
พ่อแม่ของตั๋ว ยิ่งเหลือพระเจ้า
สิบ-ซาวองค์ หมื่นวัด
ขออย่ากล๋ายเป๋น ลูกเผตลูกยักษ์
เตวะตั๊ดเข้า มาดล
คุณพ่อแม่นั้น ฮ้อนแดดหนาวฝน
ยังปกห่มบน ลูกหลานทั่วหน้า
พ่อแม่ของตั๋ว บุญคุณแกล้วกล้า
บ่มีสังมา เผียบตั๊ด
บุญกิ๋นบุญตาน ตี้ทำในวัด
ยังบ่เผียบได้ คุณครอง
คุณพ่อแม่นั้น บ่มีแถมสอง
เอามาเทียบตรอง เหมือนพ่อแม่ได้
พระเจ้าคิ่นตั๋ว เจ้ายังบ่ไหว้
ไปหลงอาลัย เพื่อนป๊อง
ยามเจ้าหิวโหย ข้าวบ่ตกต๊อง
จักคิดฮอดบ้าน คาวา
พ่อแม่เท่านั้น ท่านยังห่วงหา
อย่าหนีไฟนา ไปเป่าหิ่งห้อย แหล่นายเหย.....