หลานเหยหลาน ก๋านเกิดเป๋นคนยังมีชีวิต หื้อหลานช่างคิด อย่าเอาอย่างคนผิด อย่าเป๋นมิตรกับเสือ อย่าลงเฮือยามน้ำเชี่ยว อย่าไปเยี่ยวใส่กล๋างต่าง อย่าไปพรางกำสอน อย่าไปนอนเล่นดาบ อย่าไปก๊าบกำเสีย อย่าแบ่งเมียหื้อจู้ อย่าอู้กำลับในตี้นอน อย่าไปสอนจักเข้ว่ายน้ำ อย่าไปก๊ำต้นกล้วยยามลม อย่าไปอมของเปิ้นฝาก อย่าถากไม้มาหามือ อย่าไปถือกำพ่อแม่ อย่าไปตึดตางแว่ตางเดิม อย่าไปเสริมกำส่อ อย่าสิฮังต่ออย่าล่อฮังแต๋น อย่าไปแหงนถ่มน้ำลายขึ้นฟ้า อย่าไปก๊าของผิดกฎหมาย อย่าไปขายชื่อตั๋วเก่า อย่าไปเล่าขวัญครูอาจ๋ารย์ อย่าไปผลาญมรดก อย่าไปจกฮูจ๋อมปลวก อย่าไปสวกต่อเจ้านาย อย่าไปอายต่อหมอ อย่าไปซอก่อนปี่ อย่าไปลับลี้หื้อเงินตั๋ว อย่าไปกลั๋วตอมัจจุราช อย่าอวดฉลาดต่อเจ้าของ อย่าไปจ๋องหองต่อผู้มีอำนาจ อย่าไปประมาทหมาดุ อย่าไปจุผู้มีศีล อย่าไปกิ๋นของสังฆะ อย่าไปละลูกน้อย อย่าไปปล่อยข่าวลือ อย่าไปตือคนบ้า อย่าไปต๊าคนเมา อย่าไปเข้าข้างคนผิด อย่าไปติดสินบน อย่าเป็นคนหลายชื่อ อย่าไปรับซื้อของโจ๋ร แหล่นายเหย.
ปู่สอนหลาน · ลำดับ 056