กิ่วกู๋กิ่วดอย กิ่วฮอยป่าไม้ กิ่วสูงต่ำใต้ กิ่วไผฮู้หัน กิ่วคนมนุษย์ กิ่วก๋รรมต่างกั๋น กิ่วไผกิ๋วมัน เผียบกั๋นบ่ได้ เหมือนปล๋ายเฮียวบง พ่องลงต่ำใต้ พ่องสูงขึ้นไป ชี้ฟ้า กิ่วมีเหมือนกั๋น อย่าผันตอบต๊า ย่ำกล๋ายเหยียบข้าม ลวงพราง เหมือนอ้อยต่าวล้ม บ่ส้มก็จ๋าง มีดน้อยคมบาง บ่เตียมมีดโต้ เจือกป้อยามฝน บ่ทนเหมือนโซ่ เอามาทำโท ลากจั๊ก มนุษย์หญิงจาย ก๋รรมหมายตอบตึ๊ก พ่องตุ๊กข์ต่ำใต้ ดิ้นรน คนทำดีไว้ บ่ได้อับจ๋น กลับกล๋ายเป็นคน มั่งมูลมีได้ ไม้โค่นยามลม คนล้มนั่นไสร้ อย่าฟั่งเยาะใย ชาตินี้ พ่องเป็นเศรษฐี ร่ำรวยล้านลี้ กลับก๋ายเป็นหนี้ ซมซาน อย่าข้ามคนล้ม อย่าข่มคนผลาญ เกิดบุญสมปาน เพิ่นมาช่วยตุ้ม พ้นจากยากจ๋น บุญดลโอบอุ้ม ก็น่าภาคภูมิ ใจ๋นัก คนง่าวได้จ๋าหม้อแก๋งหนา ได้เดือดแต๊ตึ๊ก จ่างหุมเดือดหั้น เมินนาน แหล่นายเหย.
ปู่สอนหลาน · ลำดับ 059