ก๊าบได้บินบ่ได้ เผียบไปคล้ายนก เหยื่อหนักปาป๊ก บินไปบ่ไหว คนตัณหานัก โลภลักหนักใจ๋ ต๋าหันเท่าใด จักเอาเท่านั้น แฮงตั๋วบ่นัก แบกของหนักหั้น หลังช่างหักทัน ท่านไท้ แอวตั๋วช่างก่อง แบกของหนักไว้ ปาไปบ่ได้ หมายพอง มีเมียหนึ่งแล้ว ใคร่แอมแถมสอง ขี่เฮือน้ำนอง ซ้อนสองช่างหล้ม พ่องซ้อนแผวสาม ปาฮามฝาดส้ม ครอบครัวระทม กล๊าดว้าง พ่องหันจ๊างขี้ ใคร่ขี้เหมือนจ๊าง ทำตั๋วอวดอ้าง สังคม ตี๋กล๋องแข่งฟ้า ช่างปาตกจ๋ม ขี่ม้าแข่งลม ช่างปาฮ้อนไหม้ เยี๊ยะหยังล้ำตั๋ว ก๊าบได้บินบ่ได้ แฮงตั๋วเท่าใด บ่คิด นกน้อยแป๋งฮัง ยังแป๋งน้อยนิด ปอตั๋วอยู่ได้ ปอแฮง เผียบหินขว้างซัด ถูกตั๊ดดินแข็ง ช่างหุมบองแบง สะต้อนใส่หน้า แหล่นายเหย.
ปู่สอนหลาน · ลำดับ 064