ขอนชะราเฮา ชอบเล่าตำนานไว้ เป๋นดั่งไม้ไต้ คบไฟส่องแสง ขอนมีเห็ดน้อย ด้อยเงินบ่แข็ง ความรู้เป๋นแฮง เต๋มปุ๋มเนอเจ้า
อันขอนชะรา หมายถึงผู้เฒ่า วิชาบ่เบา แต๊ตั๊ก ชอบเล่านิทาน ตำนานอ้ายยักษ์ ถูกกุมารฆ่า ต๋ายวาย
เดี๋ยวนี้ปู่ยักษ์ ย่ายักษ์ห่างหาย เกิดเด็กหญิง-จาย กล๋ายเป๋นยักษ์ได้ ยักย้ายถ่ายเท ชอบเตฮ้อนไหม้ ชอบขี่มอเตอร์ไซค์ ซิ่งรถ
เป๋นหมู่เป๋นฝูง ตวยกั๋นเหมือนมด ชอบปล้น จี้ ฆ่า ฟัน แทง กระชากกระเป๋าเปิ้น หนึ่งเมินกำแหง เมื่อค่ำคืนแลง เขาซิ่งออกบ้าน
ลูกไผก็ใจ๋มัน พ่อแม่ท่านหย้าน กลั๋วถูกติดตะราง คอกคุก บ่เป๋นหลับบ่เป๋นนอน ปาพ่อแม่ตุ๊กข์ หนังสือบ่ฮ่ำ บ่เฮียน
ไปเป๋นเปรตยักษ์ สุดจักปวดเศียร คอกตคุกวนเวียน ยาบ้า ปาหยุ้ง