“สัพป๊ะปล๋าหมอ ก่อต๋ายย้อนปาก เป๋นเหยื่อหลายหลาก กำปากปราศรัย สิ่งตี้กิ๋นได้ หื้อเอาไว้ในไห สิ่งตี้กิ๋นบ่ได้ หื้อเอาไว้ในใจ๋” ก๋ารต๋ามใจ๋ปาก ช่างลำบากต้อง โรคภัยช่างข้อง เรื่องกิ๋นอาหาร คนเฮาจะสุข จะตุ๊กข์จะผลาญ ปากฮู้ประมาณ กึ๊ดก๋ารถี่ถ้วน กิ๋นหน้อยก็ผอม กิ๋นนักก็อ้วน กิ๋นหยังเปิงกวร พินิจ กำปากเป๋นเอก เสกภัยเสกพิษ ช่างฮ้อนลวกไหม้ เหมือนไฟ ก่อนปากยั้งคิด ชีวิตสดใส ปากหยังกำใด เลือกเฟ้นก่อนเจ้า แม้แต่ปากก๋า ก่อปาหื้อเศร้า ขีดเขียนความเอา โต้ษฮ้าย คนมีผะญ๋า ฐานายกย้าย กระดาษแผ่นเดียวได้ เป๋นดี กระดาษแผ่นเดียวนั้น แลกเงินล้านดีหลี กระดาษปากก๋ามี เซ็นชื่อลงหั้น เป๋นหนี้เป๋นสิน ปากก๋าหมายหมั้น กระดาษแผ่นเดียวสำคัญ เพราะเซ็นชื่อไว้ ปากก๋าปาต๋าย ป่าตุ๊กข์ยากไร้ ปาเป๋นเศรษฐีก็ได้ เนอนาย ปากคนเฮานี้ ฮ้าย-ดีเหลือหลาย ปากปาวำวาย เพราะกำกึ๊ดสั้น ปาเป๋นเศรษฐี ปากมีคุณหั้น เรื่องปากสำคัญ จำไว้-แหล่นายเหย.
ปู่สอนหลาน · ลำดับ 082