นาดีเพิ่นบ่ละ หื้อเป๋นฮั้ง จ๊างดีเพิ่นบ่ เปลี่ยนหลายกวาน ขะมุกับจ๊าง แม่ฮ้างกับหนาน ส้มกับแม่มาน หวานกับคนเฒ่า จะบุ๊บตี๋หมา หื้อผ่อหน้าเจ้า พิจารณาเอา เข้าไว้ หลงป่าเปาปง กล๋างดงป่าไม้ ยังปิ๊กป๊อกได้ คืนมา หลงจิตใจ๋นั้น มันมีปั๋ญหา ยากจักคืนมา เหมือนเดิมเก่าอั้น จะก๋ำอันใด ก๋ำได้หื้อหมั้น ทำก๋ารหื้อมัน เรียบร้อย จะกิ๋นก็ว่าจ๊ะ จะละแม้สักเล็กน้อย ก็เสียดายอั้น ความงาม จายบวชสามตุ๊ หญิงหลุผัวสาม บ่สมเปิงนาม คบหาแวดใกล้ พริกมีเฮือนเหนือ เกลื๋อมีเฮือนใต้ ปล๋าจ่อมเปิ่งใบ จักไคแน่แต๊ งูเหลือมตั๋วหลวง ก๊านเครือน้ำแน้ เครือ ผักปั๋งแป้ จามลอง กดกังปล๋าค้าว หากิ๋นกล๋างหนอง อันปล๋าซิวตอง เซาะกิ๋นน้ำตื้น จ้าติเจื๊อแต๋งลาย อย่าหมายจักขึ้น ตี้ก๊างบ่าแฟง บ่าฟัก ผ่องัวตี้หาง ผ่อนางตี้ฮัก หื้อผ่อแม่เฒ่า ถึงยาย อันอ้อยต้อนเก๊า หวานกว่าต้อนปล๋าย ไคร่เป๋นเจ้านาย หมั่นเฮียนเต๊อะเจ้า แหล่นายเหย.
ปู่สอนหลาน · ลำดับ 083